Дифтерия – бұл Corynebacterium diphtheriae бактериясы тудыратын өткір жұқпалы ауру. Ауру жоғарғы тыныс жолдарының зақымдалуымен, шырышты қабаттарда фибринозды жабындардың пайда болуымен және дененің айқын интоксикациясымен сипатталады. Дифтерия – бұл уақтылы емделмеген жағдайда ауыр асқынуларға әкелуі мүмкін ауыр инфекция.
Дифтерияны кез-келген адам жұқтыруы мүмкін, бірақ ол көбінесе вакцинацияланбаған балаларда кездеседі.
Дифтерия ауруының алдын алу немесе оның басқа адамдарға таралуын болдырмаудың ең жақсы жолы ол – вакцинация. Дифтерияға қарсы вакцина қауіпсіз және ағзаның инфекциямен күресуіне көмектеседі.
Дифтерияның белгілері:
- интоксикация (қызба, шаршау, жалпы әлсіздік);
- жұтынған кездегі тамақтың ауруы;
- бадамша бездердің ісінуі, жабын пайда болуы (зақымдалған тінде сұр қабықшалар пайда болады);
- дауыстың қарлығуы, құрғақ жөтел, тыныс алудың қиындауы;
- мұрыннан су ағу;
- мойынның ісінуі.
Токсин қанға түскен жағдайда, өмірге қауіп төндіретін асқынулар пайда болады - жүректің, бүйректің және жүйке жүйесінің зақымдануы (тыныс алу бұлшықеттерінің сал ауруына шалдығу қаупі). Балалар арасында өлімге әкелген жайттар жиі кездеседі.
Дифтерия диагностикасы клиникалық тексеруді және зертханалық зерттеу әдістерін қамтиды:
- Бактериологиялық өсіру: Corynebacterium diphtheriae бактерияларын анықтау үшін жұтқыншақтан немесе мұрыннан жағынды алу.
- Токсинді анықтауға арналған экспресс тесттер: иммуноферменттік әдістерді қолдану арқылы токсиннің болуын анықтау.
- Серологиялық зерттеулер: қандағы токсинге қарсы антиденелерді анықтау.
Біздің ҚР ПІБ МО «Санитариялық-эпидемиологиялық сараптама орталығы» зерттелетін биоматериалда дифтерия қоздырғышын (C. diphtheriae) анықтауға мүмкіндік беретін микробиологиялық зерттеулер 7 күннен артық жүргізілмейді.
Алдын алудың негізгі шарасы - Ұлттық профилактикалық егу
Дифтерияның қауіптілігін есте сақтаңыз!
Өз денсаулығыңыз бен балаларыңыздың денсаулығына қамқорлық жасаңыз!
