ҚР Президентінің Іс басқармасы Медициналық орталығының Санитариялық-эпидемиологиялық сараптама орталығында 2025 жылға арналған негізгі даму бағыттары талқыланған кеңейтілген жиын өтті. Жиын барысында атқарылған жұмыстардың нәтижесін жан-жақты бағалау және алдағы даму стратегиясын айқындау мақсатында Орталықтың жаңадан құрылған әріптестік органы бекітілді. Талқылауға барлық бөлім басшылары мен зертхана мамандары қатысты.
Орталықтың қызметі 2023-2024 жылдарға арналған ҚР Президенті Іс басқармасы Медициналық орталығын дамыту тұжырымдамасының үш негізгі бағыты бойынша жүзеге асырылды, Перспективалық жоспар орындалды, сондай-ақ жол картасын іске асыру аясында зертханалық зерттеулердің толық спектрін қамтитын 8 зертхана іске қосылды. Референс-зертхана мәртебесі алынды. Зерттеулер түрлері көбейіп, ұлттық және халықаралық стандарттарға сай жаңа әдістер енгізілді. Бұл санитариялық-эпидемиологиялық шаралардың қауіпсіздігін арттырып, зерттеу уақытын қысқартуға, процестерді автоматтандыруға және нәтижелердің дәлдігін жоғарылатуға мүмкіндік берді. Жоспарланған көлемнен 160% артық зерттеулер жүргізілді. Бұл жағдай зертханалардың жүктемесінің жоғарылап, жұмыстардың тиімді жүргізілгенін көрсетті. МЕМ ГОСТ ISO/IEC 17025-2019 аккредитация аттестаты алынып, зертханаға ILAC халықаралық белгісін қолдануға рұқсат берілді. Зертханалар арасындағы салыстырмалы зерттеулер саны екі есе артып, оның ішінде FAPAS (Ұлыбритания) сияқты халықаралық бағдарламаларды қоса алғанда, 25 бағдарлама енгізілді.
Кадрлық әлеуетті дамытуға ерекше көңіл бөлінді: 275 маман оқытылып, Таиланд, Болгария, Ұлыбритания және басқа да елдерде халықаралық тәжірибе жинақталды. Сондай-ақ, Таиландтың референс-зертханасымен және Қазақстандағы үш ғылыми-зерттеу институтымен ынтымақтастық туралы меморандумдарға қол қойылды.
Орталық 5 жыл мерзімге халықаралық институционалдық аккредитация куәлігін алды. Орталық базасында халықаралық оқу орталығы мен TOXBAS халықаралық дерекқорымен жұмыс істейтін токсикологиялық ақпараттық орталық ашылды.
Зертханалық ақпараттық жүйе (ЗАЖ) өндірістік пайдалануға берілді. Сондай-ақ, ақауларды жоюды бақылау және оқиғаларды тіркеу үшін QR-кодтары бар «ASPANS» ақпараттық жүйесінің пилоттық жобасы іске қосылды.
Жиын барысында Орталықтың әрі қарай дамуына ерекше көңіл бөлінді. Мемлекет басшысы айқындаған бағыт аясында санитариялық-эпидемиологиялық қауіпсіздікті қамтамасыз ету, ұлт саулығын нығайту және заманауи диагностика технологияларын енгізу бойынша белсенді жұмысын жалғастыратын болады. 2025 жылға арналған басым бағыттар анықталды: инфрақұрылымды жаңғырту, халықаралық ынтымақтастықты дамыту, нормативтік базаны жетілдіру және мамандардың біліктілігін арттыру. Бұл шаралар Орталықтың жұмыс тиімділігін арттырып қана қоймай, елдегі санитариялық-эпидемиологиялық қауіпсіздіктің жоғары деңгейін қамтамасыз етуге мүмкіндік береді.
