Еліміздің түкпір-түкпірінде ауқымды тұрғын үй құрылысы жалғасуда. Жаңа тұрғын үй кешендері, мектептер, балабақшалар мен медициналық мекемелер ондаған жылдар бойы қызмет көрсетуге есептеліп салынады. Алайда, бұл ғимараттар денсаулыққа қаншалықты қауіпсіз? Құрылыс және әрлеу жұмыстарында қолданылатын материалдар адам ағзасына теріс әсер етуі мүмкін бе? Неліктен жаңа пәтерлерде иіс кетпейді, бас ауруы немесе тыныс алу жолдарының тітіркенуі пайда болады? Бұл сұрақтарға жауаптар құрылыс саласының белсенді түрде жүргізіліп жатқан кезінде және санитариялық нормалардың сақталуы қажеттілігі артып тұрған шақта аса өзекті болып табылады.
Бұл мәселелерге арналған «Қолайлы және қауіпсіз тұрғын үй» дөңгелек үстелі санитариялық-эпидемиологиялық сараптама орталығында өткізілді. Шараға Орталықтың зертхана қызметкерлері, құрылыс және сараптама саласының мамандары қатысты. Қатысушылар қай материалдардың шын мәнінде қауіпсіз екенін, өнімдерге токсикологиялық және санитариялық-гигиеналық бағалау қалай жүргізілетінін және жаңа материалдардың — линолеумнан бастап тығыздағыштар мен бояу жабынындардан шығатын иістерді тексерудің маңыздылығын талқылады.
Орталықтың токсикология зертханасының мамандары ішкі әрлеу жұмыстарында қолданылатын өнімдерге жүргізілетін бағалау туралы айтып берді. Зерттеу объектілері ретінде түрлі жабындар, бояулар, желімдер, тығыздағыштар, жылу оқшаулағыш панельдер, төбе жабындары аталды. Зертханаларда дәстүрлі in vivo әдістері мен қазіргі заманғы in vitro зерттеулері қолданылады. Мұндай әдістердің бірі «АТ-05 уыттылық анализаторы» құрылғысын қолдану арқылы жүзеге асырылады, бұл құрал зертханалық жануарларды пайдаланбай-ақ өнімнің токсикалық деңгейін жылдам анықтауға мүмкіндік береді. Бұл тәсіл адам қолданатын материалдармен жұмыс істегенде өте маңызды.
Қатысушылар сондай-ақ одорометриялық зерттеулерге — материалдар шығаратын иістердің күшін нақты жағдайларда өлшеуге — ерекше назар аударды. Қолданыстағы санитариялық нормаларға сәйкес, иіс деңгейі екі баллдан аспауы керек. Бұл көрсеткіш әлеуметтік инфрақұрылым объектілері — мектептер, балабақшалар, медициналық мекемелер және тұрғын үйлер үшін өте маңызды.
Сондай-ақ, Орталықтың радиология және аспаптық өлшеулер зертханасының жұмысы таныстырылды. Зертхана құрылыс кезеңдерінің әр сатысында бақылауды жүзеге асырады — жер учаскесінің радиациялық фонын бағалаудан бастап, дайын ғимараттарда өлшеулер жүргізеді. Құрылыс материалдарын радиологиялық бағалау әдістері көрсетілді (гамма-фон, радон мен торон деңгейін анықтау), сондай-ақ физикалық-химиялық және микроклиматтық көрсеткіштер: шу мен діріл деңгейі, температура, ылғалдылық, ауа қозғалысының жылдамдығы, жарықтандыру және электромагниттік сәулелену өлшенді. Барлық зерттеулер заманауи жабдықпен жүзеге асырылады: «Экофизика-110А», «Мультирад МКС», «Альфарад плюс», спектрометрлер мен дозиметрлер.
Талқылау барысында өнімді белгілеу мен сәйкестендіру, техникалық регламенттер мен санитариялық талаптарға сәйкестігі жөніндегі практикалық мәселелер қозғалды. Қатысушылар тұрғын үйдің қауіпсіздігі тек үйді пайдалануға бергенге дейін емес, құрылыс материалдарын таңдаудан бастап, әрбір кезеңде бақылау жүргізуден басталатынын атап өтті. Мұндай кешенді тәсіл тәуекелдерді азайтып, шын мәнінде қауіпсіз және қолайлы өмір сүру ортасын қалыптастыруға мүмкіндік береді.
Дөңгелек үстел аяқталғаннан кейін қатысушылар Орталық зертханаларымен танысып, материалдар мен қоршаған ортаның сапасы мен қауіпсіздігін бағалау үшін қолданылатын әдістер мен құрылғылардың техникалық мүмкіндіктерімен танысты. Практикалық демонстрация адамдардың денсаулығына тікелей әсер ететін сараптамалық бақылаудың маңыздылығы туралы түсінікті нығайтты.
Қауіпсіз тұрғын үй — бұл тек жайлылық, дизайн мен энергия тиімділігі емес. Бұл, ең алдымен, адамдардың, әсіресе балалар, қарттар және ғимаратта көп уақыт өткізетін адамдардың денсаулығы. Санитариялық-эпидемиологиялық сараптама орталығы құрылыс, жобалау және объектілердің сапасын бақылау саласында санитариялық қауіпсіздікті қамтамасыз ету және салалар арасындағы өзара әрекеттестікті нығайту бойынша жұмыстарын жалғастыруда.
