ҚР Президенті Іс басқармасының Медициналық орталығының санитариялық-эпидемиологиялық сараптама орталығында дезинфекциялық құралдарды қауіпсіз пайдалану бойынша оқыту семинары өтті.
Семинар барысында дезинфекциялық құралды дұрыс таңдау, оны денсаулыққа зиян келтірмейтіндей етіп қолдану, тыйым салынған және шартты түрде қауіпсіз деп танылған заттар туралы мәселелер қозғалды. Сонымен қатар медицина және білім беру ұйымдарында дезинфекция жүргізу кезінде жиі кездесетін қателіктер талқыланды. Осы және өзге де маңызды сұрақтарға қатысушылар толыққанды жауап алды.
Семинар ҚР Денсаулық сақтау министрлігінің Санитариялық-эпидемиологиялық бақылау комитеті және ҚР ДСМ Қоғамдық денсаулық сақтау ұлттық орталығы бірлесіп ұйымдастырды. Іс-шараға 60-қа жуық адам қатысты. Олардың қатарында емдеу-алдын алу ұйымдарының, мектепке дейінгі мекемелердің, қоғамдық тамақтану кәсіпорындарының, өндіріс орындарының, бизнес және дезинфекция маңызды рөл атқаратын өзге де салалардың өкілдері болды.
Тақырыптың өзектілігін Орталықтың токсикология зертханасының деректері де растады: 2025 жылдың қаңтар–ақпан айларында зерттелген дезинфекциялық құралдардың 50%-дан астамы нормативтік талаптарға сай келмеген. Ең жиі тіркелген бұзушылықтар — белсенді хлор мен төрттік аммоний қосылыстарының мөлшері бойынша ауытқулар. Бұл деректер мамандардың дезинфекциялық құралдарды қауіпсіз қолдану ережелері туралы білімі мен хабардарлығын тұрақты түрде арттыру қажет екендігін көрсетеді.
Семинар барысында Орталық мамандары дезинфекциялық құралдарды таңдау мен оларды қауіпсіз қолданудың ережелерін, сақтау ерекшеліктерін, ерітінділерді дайындау тәртібін, таңбалау және қаптау талаптарын түсіндірді.
Сондай-ақ, дезинфекциялық құралдарға қойылатын заманауи талаптарға жеке назар аударылды. Атап айтқанда — олардың тиімділік өлшемшарттары, медицина қызметкерлері үшін қауіпсіздігі, экологиялық тазалығы және халықаралық стандарттарға сәйкестігі айтылды. Бұл тақырыпты қоғамдық денсаулық сақтау ұлттық орталығының маманы ұсынды.
Қатысушылар Еуразиялық экономикалық одақ аясындағы дезинфекциялық құралдарды мемлекеттік тіркеу тәртібін де талқылады. Санитариялық-эпидемиологиялық бақылау комитетінің өкілі тіркеу куәлігін алу кезеңдерін, тіркеуден бас тарту себептерін, құжаттарға қойылатын талаптарды және өнімнің қауіпсіздігін қамтамасыз етудегі бақылаушы органдардың рөлін түсіндірді.
Іс-шара белсенді форматта өтті: қатысушылар практикалық сұрақтар қойып, өзара тәжірибе алмасты. Оқу соңында барлық тыңдаушыларға аты-жөні көрсетілген бейдждер мен қатысу сертификаттары табысталды.
Санитариялық-эпидемиологиялық сараптама орталығы дезинфекциялық құралдарды қауіпсіз пайдалану жөніндегі кәсіби құзыреттілікті арттыру мақсатында осындай білім беру іс-шараларын алдағы уақытта да жалғастыратын болады.
