Ойыншықтар баланың дамуы мен қоршаған ортаны танып-білуінде маңызды рөл атқарады. Алайда олардың қауіпсіздігі ең алдымен қолданылған материалдардың сапасына байланысты. Сондықтан шығу тегі белгісіз және қауіпсіздігін растайтын құжаттары жоқ өнімдерді таңдағанда ерекше сақ болған жөн.
Токсикология зертханасының маманы Саламат Жаникулованың айтуынша, сапасыз ойыншықтардың құрамында адам ағзасына зиян келтіруі мүмкін қорғасын, фталаттар, формальдегид және бисфенол А секілді химиялық заттар кездесуі ықтимал.
Қорғасын жүйке жүйесіне кері әсер етуі мүмкін. Фталаттар пластикке жұмсақтық пен икемділік беру үшін қолданылады, алайда олардың мөлшері белгіленген нормадан асқан жағдайда ағзаға зиянды әсер етуі ықтимал.
Формальдегид тыныс алу жолдары мен шырышты қабықтарды тітіркендіріп, аллергиялық реакциялар туындатуы мүмкін. Бисфенол А (BPA) ағзаның эндокриндік жүйесіне ықтимал әсерімен байланыстырылады.
Балалар мұндай химиялық заттардың әсеріне әсіресе сезімтал. Себебі олар ойыншықтармен ұзақ уақыт байланыста болып, әсіресе ерте жаста ойыншықтарды аузына жиі салады.
Қауіпсіз ойыншықты қалай таңдауға болады?
- ойыншықтарды сенімді сауда орындарынан сатып алыңыз;
- өнімнің таңбалануына және өндіруші туралы ақпаратқа назар аударыңыз;
- қауіпсіздігін растайтын құжаттарының бар-жоғын тексеріңіз;
- өткір химиялық иісі бар немесе ақауы байқалатын ойыншықтарды сатып алмаңыз;
- баланың жас ерекшелігіне сәйкес келетін ойыншықтарды таңдаңыз.
Ойыншық таңдауға жауапкершілікпен қарау баланың зиянды химиялық заттардың әсеріне ұшырау қаупін азайтып, оның денсаулығын қорғауға көмектеседі.
Бағдарламаның толық нұсқасын төмендегі сілтеме арқылы көруге болады: https://youtu.be/4aScAXMGQQo?si=kTWt6HjrxxknL1Ex
