Бүгін Санитариялық-эпидемиологиялық сараптама орталығы Қазақстан Мұсылмандары Діни басқармасы «Халал Даму» стандарттау және сертификаттау орталығының өкілдері үшін Ашық есік күнін өткізді. Іс-шараның негізгі мақсаты – молекулалық-генетикалық технологияларды таныстырып, өнімнің құрамын дәл анықтаудағы және оның халал стандарттарына сәйкестігін растаудағы рөлін көрсету болды.
Шара барысында Орталықтың мамандары жануар тектес компоненттерді анықтауға мүмкіндік беретін заманауи ДНҚ әдістерін қолдану тәжірибесін көрсетті. Бұл әдістер халал сертификаттау процесінде маңызды рөл атқарады. Сонымен қатар, қатысушыларға жоғары технологиялық жабдықтардың мүмкіндіктері таныстырылды. Бұл жабдықтар талдауларды жылдам, дәл және сенімді орындауға мүмкіндік береді.
«Дәлдік пен сенім – халал индустриясындағы өнімдерді сертификаттаудың басты қағидаттары. Бүгінгі Ашық есік күні біздің ғылыми-техникалық мүмкіндіктерімізді танытып, серіктестік байланыстарымызды нығайтуға мүмкіндік берді. Біз қатаң халықаралық сапа және қауіпсіздік стандарттарына сай келетін инновациялық шешімдер ұсынамыз», – деп атап өтті СЭСО директоры Сауле Шарипова.
Іс-шара «Халал Даму» және бизнес өкілдерімен әріптестікті нығайтуға бағытталған маңызды алаңға айналды. Орталықта қолданылатын ДНҚ технологиялары зерттеулердің жоғары сапасын қамтамасыз етіп, халал талаптарына толық сәйкестікті дәлелдейді.
