Қазақстан Республикасы Президентінің Іс басқармасы Медициналық орталығының Санитариялық-эпидемиологиялық сараптама орталығында азық-түлік өнімдерін бұрмалау мәселелеріне арналған халықаралық онлайн-дәріс өтті.
Дәрісті Дублин технология университетінің азық-түлік қауіпсіздігі саласындағы маман - Сара Бойд өткізді. Шара барысында сарапшы азық-түлік өнімдерін бұрмалауға қарсы күрестің негізгі бағыттары мен әдістерін, сондай-ақ осы мәселемен күресетін уәкілетті органдардың кездесетін қиындықтарын талқылады. Сонымен қатар осындай жағдайларды тергеу барысындағы халықаралық тәжірибелер туралы айтып өтті.
Қатысушылар дәріс барысында азық-түлік саласындағы алаяқтықты анықтау әдістері, зертханалық зерттеулер үшін сынамаларды дұрыс іріктеу тәртібі және талдау нәтижелерін уәкілетті органдарға ұсынудың талаптары мен рәсімдері туралы толық ақпарат алды.
Шараға Орталықтың құрылымдық бөлімдерінің қызметкерлері мен зертхана меңгерушілері қатысты. Бұл іс-шара мамандарға кәсіби білімдерін тереңдетіп, азық-түлік өнімдерінің қауіпсіздігін қамтамасыз ету саласындағы халықаралық озық тәжірибелермен танысуға мүмкіндік берді.
