ҚР Президенті Іс басқармасы Медициналық орталығының Референс-зертханасында «Тағамнан уланудың, соның ішінде ботулизмнің алдын алу. Консервілеудің негізгі қағидаттары» тақырыбында оқыту семинары өтті.
Іс-шараны ашқан Сауле Шарипова, Референс-зертхана директоры, өз сөзінде тағам қауіпсіздігі - санитариялық-эпидемиологиялық қызметтің басты бағыттарының бірі екенін атап өтті. Оның айтуынша, ботулизм – ең қауіпті тағамдық уланулардың бірі, ал оны болдырмаудың жалғыз жолы – халықты уақтылы ақпараттандыру мен тағам өнімдерін сақтау және консервілеу кезіндегі санитариялық талаптарды қатаң сақтау.
Семинар барысында түрлі сала мамандары мазмұнды баяндамалар жасады. Баян Жусупова, санитариялық-бактериологиялық зерттеулер зертханасының меңгерушісі, ботулизмді анықтаудың заманауи зертханалық әдістерін таныстырды. Сандугаш Баянова, санитариялық дәрігер, үй жағдайында консервілеу кезінде жиі кездесетін қателіктер мен нақты тәжірибелік мысалдармен бөлісті. Жазира Рахимбекова, «Репродуктивті медицина институтының» дәрігер-зертханашысы, тағамдық интоксикациялардың медициналық салдарын түсіндірді. Ал Асель Касымова, ҚР Қарулы Күштерінің Санитариялық-эпидемиологиялық орталығының аға эпидемиолог-дәрігері, жабық және әскери ұжымдарда алдын алу шараларын ұйымдастыру ерекшеліктеріне тоқталды.
Семинарға денсаулық сақтау және санитариялық-эпидемиологиялық қызмет өкілдері, әскери құрылымдардың мамандары, қоғамдық тамақтану және қонақүй бизнесінің қызметкерлері, сондай-ақ білім беру ұйымдарының өкілдері қатысты.
Іс-шара мазмұнды әрі тәжірибелік бағытта өтті: қатысушылар тағамдық уланудың алдын алу бойынша заманауи тәсілдерді талқылап, тәжірибе алмасты және санитариялық мәдениетті арттырудың маңыздылығын атап өтті.
Оқу соңында қатысушыларға арнайы сертификаттар табысталды.
