Жедел дайындалатын кеспе кең таралған тұтыну өнімі болғандықтан, оның қауіпсіздігіне қатысты талаптар айрықша маңызға ие. Өндіріс үдерісі бірнеше технологиялық кезеңнен тұрады және осы кезеңдердің әрқайсысында дайын өнімнің сапасы мен химиялық құрамына ықпал етуі мүмкін факторлар кездеседі. Сондықтан мұндай өнімдер жүйелі түрде зертханалық бақылаудан өткізіледі.
Тексерудің негізгі бағыттарының бірі – құрамындағы ауыр металдардың (қорғасын, кадмий, сынап, мышьяк) деңгейін анықтау. Бұл элементтер ағзада жиналған жағдайда уытты әсер туғызуы мүмкін. Ластану көздері ретінде шикізат құрамындағы компоненттер, өндірістік жабдық немесе технологиялық орта факторлары болуы ықтимал. Қолданылатын заманауи зертханалық әдістер ауыр металдардың ең төмен концентрацияларын анықтауға мүмкіндік береді және өнімнің қауіпсіздік деңгейіне дәл әрі объективті баға береді.
Зерттеу барысында үлгілерді дайындау және минералдау, элементтердің нақты мөлшерін жоғары дәлдікті аналитикалық құралдармен анықтау, сондай-ақ қаптамадағы дәмдеуіш пен соустардың құрамына бағалау жүргізіледі. Осындай кешенді тәсіл өнімнің толық сипаттамасын жасап, оның белгіленген санитариялық нормативтерге сәйкестігін анықтауға мүмкіндік береді.
Бұл бағыттағы зерттеулердің барлығы Қазақстан Республикасы Президенті Іс басқармасы Медициналық орталығының Референс-зертханасында жүргізіледі. Қорытындылар мемлекеттік және халықаралық стандарттар талаптарына сәйкес дайындалады, бұл өз кезегінде тағам өнімдерінің қауіпсіздігіне жоғары деңгейде бақылау орнатуға жағдай жасайды. Референс-зертхананың жұмысы халық денсаулығын қорғауға және нарықтағы өнім сапасына деген сенімді нығайтуға елеулі үлес қосады.
